FAHE OSAN $200 BA KADA UMA KAIN BAZE LEGAL MAK SAIDA?

$200 atu fo ba kada uma kain ne, tama iha OJE 2022 kalae? Se latama, entaun osan tenki foti husi nebe? Imajina deit, iha ribuan uma kain iha TL, Governu tenki prepara osan ho nominal boot. Osan ho nominal boot, tenki iha baze legal atu utiliza osan nee. Baze legal nee mak saida?

Sera-ke iha debate OJE 2022 iha PN, depois de OJE 2022 passa iha faze jeneralidade, depois tama ba iha faze espesialidade, budget $200 aloka ba kada uma kain nee, debate iha PN mak passa, entaun kerdizerke $200 ne iha duni baze legal? Selae...mmmhhh??? Pergunta ida fali; "Tamba sa iha primeira ronda, ita laduun rona $200 nia naran? Ba ona segunda ronda mak teki-teki $200 viral loos..???

Pergunta balun mosu mak ne'e: "Topu Governante (mas laos Kandidatu Prezidente) hato'o iha kampainha dehan atu fahe osan $200 ba kada uma kain. Se-karik Governu iha duni osan barak atu fahe, tamba sa mak vitima rihun nebe hetan inundasaun iha 4 Abril 2021, to'o agora abandonadu hela?" Pergunta ida nee hamosu pergunta seluk, "Governu dezenha programa bazeia ba eskala prioridade ka random deit? Se bazeia ba eskala prioridade, tamba saa mak vitima inundasaun 4 Abril 2021, too agora abandonadu?"

TL agora laos ona iha situasaun Estadu Emerjensia. Nebe se-karik $200 atu aloka ba kada uma kain, nunka debate iha PN tamba la tama iha OJE 2022, mas topu Governante dehan katak Dezembru 2022, atu fahe kada uma kain $200, atu halo justifikasaun ho baze legal saida?

Konklusaun:

Gara-gara $200 sai viral, halo Eleisoens segunda ronda nee nia nuansa, hanesan fali atu hili Xefe Governu, laos atu hili Xefe Estadu.